Ferrol, 2 de xuño de 2022.- A vicerreitora do Campus de Ferrol e Responsabilidade Social, María Jesús Movilla, o alcalde do Concello de Ferrol, Ángel Mato, e a directora do Campus Industrial de Ferrol, Ana Ares, presentan mañá, venres 3 de xuño, ás 20:00 horas, no Antigo Hospicio da cidade, a primeira das conferencias do Curso de Verán dedicado ás enerxías renovables. Na súa intervención, as profesoras e investigadoras da Universidade da Coruña, Laura Castro Santos e Almudena Filgueira Vizoso, falarán sobre a enerxía eólica offshore.
A segunda das conferencias terá lugar o xoves 16 de xuño no Salón de Plenos do Concello das Somozas. Nesta ocasión, será o profesor e investigador Antonio Enrique Masdías Bonome quen achegue ao público asistente á enerxía solar e á eficiencia enerxética. Sobre a enerxía maremotriz e undimotriz falarán o CEO de Puerta de Asia, Santiago Gil Casares, e o profesor Raúl Villa Caro, o xoves 23 de xuño, na Casa da Cultura de Valdoviño. Unha semana despois, o xoves 30 de xuño, o profesor e investigador Fernando de Llano Paz reflexionará sobre a transición enerxética na Casa da Cultura de San Sadurniño.
Xa no mes de xullo, a adxunta a Transferencia da Vicerreitoría de Política Científica, Investigación e Transferencia, Sonia Zaragoza Fernández, falará sobre hidróxeno verde na Casa Dopeso das Pontes e o profesor e investigador Luis Montenegro Pérez sobre a situación actual e as perspectivas de futuro das enerxías renovables no Café Teatro do Pazo da Cultura de Narón.
