Ferrol, 12 de decembro de 2024.- A Base de Resposta Humanitaria de Emerxencias das Nacións Unidas (UNHRD), xestionada polo Programa Mundial de Alimentos (PMA) e situada en Bríndisi (Italia), acolle, este xoves 12 e venres 13 de decembro, o último simulacro do proxecto europeo Comumunity of Valued Experts in Hydrometeorological and Technological Multi-Hazards (COVALEX), que coordina a UDC baixo o liderado da profesora da EPEF e investigadora individual CITENI, Sonia Zaragoza.
O escenario elixido para este exercicio, no que se inclúen diversos riscos químicos, biolóxicos, radiolóxicos e nucleares (CBRN) para o conxunto da poboación, forma parte dunha rede mundial de cinco bases loxísticas humanitarias situadas, ademais de en Bríndisi (Italia), en Accra (Ghana), en Dubái (Emiratos Árabes Unidos), na Cidade de Panamá (Panamá) e en Kuala Lumpur (Malasia). A súa función é a de asistir ás poboacións afectadas por desastres naturais ou emerxencias complexas, aumentando a capacidade de resposta da comunidade humanitaria internacional.
O programa desta xornada de traballo, organizada pola Asociación da Cruz Vermella de Italia, inclúe tamén varios obradoiros sobre o risco ambiental dos incendios forestais, o risco físico e ambiental das municións sen detonar ou a contaminación marítima, así como un debate aberto sobre a comunicación e cooperación transfronteiriza e unha conferencia que sentará as bases do informe final de resultados do proxecto europeo COVALEX.
Ao longo destes dous días, a profesora da EPEF, Sonia Zaragoza, estará acompañada por persoal da Universidade da Coruña, polo xerente da Axencia Galega de Emerxencias (AXEGA 112), Marcos Araújo, e máis pola concelleira de Mobilidade e Seguridade do Concello de Ferrol, María del Carmen Pieltain.
Unha proposta de guía de boas prácticas elaborada desde o Campus Industrial de Ferrol
A rotura da parede da Presa do Rei e o conseguinte desbordamento do Río Xuvia, o rescate de dúas persoas arrastradas pola corrente nas inmediacións do paseo fluvial e a caída dun autobús escolar na ensenada da Gándara foron os tres simulacros propostos poe este proxecto europeo para analizar a capacidade de resposta dos equipos de emerxencias da comarca de Ferrolterra o pasado 9 de abril. Colaboraron nestes exercicios os integrantes de Protección Civil de Narón e de Ferrol, da Policía Local de Narón, da Axencia Galega de Emerxencias, da Cruz Vermella, do Grupo de Emerxencias Supramunicipal (GES), de Salvamento Marítimo e do 061.
A primeira análise de todo o acontecido durante estes tres simulacros realizárona, nun hackathon express, un total de 56 estudantes do Máster en Prevencións de Riscos Laborais e Riscos Comúns e do Máster en Enxeñaría Industrial, titulacións que se imparten na Facultade de Ciencias do Traballo e na Escola Politécnica de Enxeñaría de Ferrol, respectivamente.
Pouco tempo despois, a experiencia e coñecemento adquiridos no marco destes tres exercicios, permitiu que o profesorado da Universidade da Coruña implicado no proxecto presentase unha guía de boas prácticas en emerxencias vinculadas a fenómenos hidrometereolóxicos e multi-risco. Nese texto, ínstase ás autoridades competentes a pór en marcha normativas europeas que sirvan de paraugas ás leis xa existentes a nivel nacional, así como a impartir formación de calidade tanto ás persoas que integran os equipos de emerxencias como á poboación en xeral.
Nesta mesma liña, a proposta de guía de boas prácticas elaborada desde o Campus Industrial de Ferrol pon enriba da mesa a creación dun “Día das Emerxencias” a nivel europeo. A maiores, o documento tamén recalca a necesidade de apostar polo deseño de infraestruturas resilientes en zonas expostas a fenómenos naturais adversos.
Unha rede europea de persoas expertas coordinada pola Universidade da Coruña
Reforzar a cooperación europea en materia de protección civil e prevención de catástrofes promovendo a posta en marcha dun sistema de gobernanza baseado en probas científicas. Este é o obxectivo do proxecto europeo COVALEX, nado baixo o paraugas da Cátedra de Protección Civil e Xestión de Emerxencias, adscrita á Facultade de Ciencias do Traballo da Universidade da Coruña, e liderado pola profesora da Escola Politécnica de Enxeñaría de Ferrol e investigadora individual do Centro de Investigación en Tecnoloxías Navais e Industriais do Campus Industrial de Ferrol, Sonia Zaragoza.
Establecer unha comunidade ampla e común de persoas expertas sobre a experiencia, a cobertura xeográfica e as diversas redes sectoriais en materia de fenómenos hidrometeorolóxicos e multi-risco. Esta é a principal liña de traballo que está a desenvolver o persoal docente e investigador da Universidade da Coruña, institución que coordina o proxecto, xunto con persoas expertas da NALAS – Rede de Asociacións Nacionais de Autoridades Locais de Europa Sudoriental de Francia, da Rede de Competencia de Desastres de Austria, da Secretaría Xeral de Protección Civil de Grecia, así como da Fundación CIMA e da Asociación da Cruz Vermella de Italia.
COVALEX está financiado pola Dirección Xeral de Protección Civil e Operacións de Axuda Humanitaria Europeas (DC ECHO), un departamento da Comisión Europea que se encarga da xestión da protección civil na Unión Europea e da axuda humanitaria no estranxeiro. Conta cun orzamento total de 774.359 euros distribuído entre os cinco socios que integran o consorcio. A Universidade da Coruña (UDC) dispón de 220.741 euros para liderar e coordinar este proxecto.
