A Coruña, 23 de xullo de 2025.- A Cátedra Epifanio Campo celebrou hoxe o acto de clausura do “Curso de Xestor de Residuos: a actividade profesional verde”, no Salón de Actos do Campus Industrial de Ferrol. O acto contou coa presenza da vicerreitora do Campus de Ferrol e Responsabilidade Social, Ana Ares Pernas; o alcalde das Somozas, Juan Alonso Tembrás; o director xeral de Rodonita Medio Ambiente, Antonio Roncero; e a directora da Cátedra Epifanio Campo, Mª Paz Mateo. O obxectivo fundamental desta formación, que tivo lugar do 17 ao 23 de xullo na Escola Politécnica de Enxeñaría de Ferrol (EPEF) e no Centro de Tratamento de Residuos Industriais de Galicia (CTRIG), é introducir ao alumnado nos coñecementos e competencias básicas necesarias no ámbito da xestión de residuos industriais.
Ao comezo da xornada, a vicerreitora do Campus de Ferrol e Responsabilidade Social, Ana Ares Pernas, agradeceu a presenza de todos os asistentes e procedeu a dar comezo ao acto. Tras o éxito das dúas edicións anteriores, a directora da Cátedra Epifanio Campo, Maripaz Mateo, destacou un ano máis a diversidade dos perfís das 16 solicitudes de inscrición recibidas e as 12 matrículas de estudantes, titulados universitarios e profesionais procedentes de diversos ámbitos.
Da mesma maneira, destacou o alto nivel do claustro de profesorado do curso, formado por profesionais altamente cualificados, cunha longa experiencia en distintos aspectos da xestión de residuos industriais. Cinco días de intensa formación e intercambio de experiencias na Escola Politécnica de Enxeñaría de Ferrol, nos que os alumnos tamén puideron gozar da visita ás instalacións do Centro de Tratamento de Residuos Industriais de Galicia, referente a nivel nacional no tratamento de residuos industriais perigosos. Ademais contouse coa intervención dun dos alumnos matriculados, Ángel Gelpi, que narrou de primeira man a súa experiencia como parte do alumnado desta terceira edición.
Pola súa banda, Antonio Roncero, director xeral de Rodonita Medio Ambiente, explicou o obxectivo do curso e a aposta de Rodonita Medio Ambiente pola vangarda no tratamento de residuos industriais, a través de Sogarisa. Así mesmo, o alcalde das Somozas, Juan Alonso Tembrás, reflexionou sobre a importancia da presenza de Sogarisa na localidade das Somozas.
Por último, a vicerreitora do Campus de Ferrol e Responsabilidade Social, Ana Ares Pernas, foi a encargada de clausurar oficialmente o curso e valorou moi positivamente que a Escola Politécnica de Ferrol poida contar cunha Cátedra como a de Epifanio Campo.
O sector industrial é un dos principais motores económicos dun país, pero tamén o que máis cantidade de residuos xera. Por este motivo, e debido á crecente preocupación pola preservación do medio ambiente, o tratamento e a xestión de residuos industriais converteuse nunha tarefa prioritaria para moitas empresas.
Cátedra EPIFANIO CAMPO
O 14 de novembro de 2019 a Universidade da Coruña (UDC)
e o Grupo Rodonita subscribiron un convenio de colaboración para o desenvolvemento da Cátedra Epifanio Campo, adscrita á Escola Politécnica de Enxeñaría de Ferrol (EPEF). O seu ámbito de actuación é o medio ambiente, a xestión de residuos e a sustentabilidade. Os obxectivos da cátedra céntranse en promocionar todo tipo de actividades de formación, divulgación, investigación e transferencia de coñecemento, relacionadas coa xestión medioambiental.
