Ferrol, 13 de novembro de 2024.- O Salón de Graos da Facultade de Humanidades e Documentación do Campus Industrial de Ferrol acolleu, este mércores 13 de novembro, o acto de entrega da primeira edición dos Premios Universitarios a Traballos Fin de Grao (TFG), a Traballos Fin de Máster (TFM) e a Teses de Doutoramento vinculadas ao eido do emprendemento e defendidas na Universidade da Coruña nos cursos académicos 2022/23 e 2023/24. Esta iniciativa intégrase no marco dun convenio de colaboración entre a Consellería de Emprego, Comercio e Emigración da Xunta de Galicia e as tres universidades públicas galegas para a promoción e o apoio ao emprendemento entre a comunidade universitaria.
Nesta primeira edición dos Premios Universitarios de Emprendemento presentáronse un total de 30 candidaturas, 1 vinculada á area de coñecemento das Artes e as Humanidades, 3 á das Ciencias, 4 á das Ciencias da Saúde, 10 á de Enxeñaría e Arquitectura e 12 á das Ciencias Sociais e Xurídicas. Finalmente, foron galardoadas un total de 11 candidaturas, 5 delas vinculadas á area de coñecemento das Ciencias Sociais e Xurídicas, 5 á de Enxeñaría e Arquitectura e 1 á das Ciencias da Saúde. Premiáronse así, 6 Traballos Fin de Grao, 3 de Máster e 2 Teses de Doutoramento. Tal e como se destaca na acta de resolución, o xurado valorou o grao de adecuación do TFG, TFM ou da Tese de Doutoramento á temática do certame, a orixinalidade e a relevancia dos resultados obtidos, o impacto do estudo sobre a súa área de coñecemento, así como a calidade académica do mesmo.
A comisión avaliadora dos premios estivo presidida pola vicerreitora de Estudantes e Empregabilidade, María José Lombardía. Exerceron como vogais, a vicerreitora do Campus de Ferrol e Responsabilidade Social, Ana Ares; o profesor da Facultade de Economía e Empresa do Campus da Coruña, Antonio García; a técnica da Oficina de Transferencia de Resultados de Investigación (OTRI), Lorena Alonso; e o presidente da delegación coruñesa da Asociación de Séniors Españois para a Cooperación Técnica (SECOT), Gonzalo Arias. Tamén actuou como secretaria, a adxunta de Empregabilidade da Vicerreitoría de Estudantes e Empregabilidade, Estefanía Mourelle.
Traballo Fin de Grao (TFG)
Área de coñecemento: Ciencias Sociais e Xurídicas
| Nome | Título | Premio | |
| 1º | Paula García Horta | Plan de negocio: panadaría-cafetería de alimentación sen gluten | 1.000€ |
| 2º | Laura Tombilla Castro | Análise estratéxica do proxecto C&D Cohousing | 500€ |
| 2º | Vanessa Parente González | Metamorfose | 500€ |
*Entregáronse dous segundos premios
Área de coñecemento: Enxeñaría e Arquitectura
| Nome | Título | Premio | |
| 1º | Pedro Redondo Loureiro | Detección automática da enfermidade de Alzhéimer a partir de imaxes OCT retinianas en ratos transxénicos PS19 tau | 1.000€ |
| 2º | José Baamonde González | Estudo do comportamento mecánico dinámico de varios tipos de velas para propulsar embarcacións | 500€ |
Área de coñecemento: Ciencias da Saúde
| Nome | Título | Premio | |
| 1º | Mencía Rey Pardo | Eficiencia do uso dun dispositivo de cardiotocografía remoto en embarazos de alto risco | 1.000€ |
Traballo Fin de Máster (TFM)
Área de coñecemento: Ciencias Sociais e Xurídicas
| Nome | Título | Premio | |
| 1º | Federico Julián Guerra D´Arcángelo | Integración de recursos multidisciplinarios para o desenvolvemento persoal | 1.000€ |
Área de coñecemento: Enxeñaría e Arquitectura
| Nome | Título | Premio | |
| 1º | Iván Barrientos Lema | Pk-Pharm: Plataforma de precisión para a posoloxía personalizada de fármacos | 1.000€ |
| 2º | Antonio Fuentes Cano | Integración arquitectónica da enerxía solar fotovoltaica (BIPV). Revisión da tecnoloxía e do sector, análise de produtos ofertados polo mercado europeo e proposta dun modelo de negocio en base ás necesidades e oportunidades | 500€ |
Tese de Doutoramento
Área de coñecemento: Ciencias Sociais e Xurídicas
| Nome | Título | Premio | |
| 1º | Ángeles María Longarela Ares | Barreiras económicas e impulsores dos investimentos en eficiencia enerxética no transporte marítimo de mercadorías: unha aproximación desde o axente-principal | 1.600€ |
Área de coñecemento: Enxeñaría e Arquitectura
| Nome | Título | Premio | |
| 1º | Harbil Bediaga Bañares | IFPTMLAlgorithmsFrom Cheminformatics Models to Software Development, StartupCreation, and Innovation Transference | 1.600€ |
