Ferrol, 16 de marzo de 2026.- O salón de actos Concepción Arenal do Campus Industrial de Ferrol acollerá, o mércores 18 de marzo, ás 18.00 horas, a conferencia “A innovación no novo contexto xeoestratéxico de defensa”, impartida por Iago González Pazos, do equipo de monodon, brazo venture e de I+D deeptech de Navantia. A ponencia forma parte do ciclo de conferencias da Cátedra Cosme Álvarez de los Ríos, impulsada pola Universidade da Coruña (UDC) e Navantia, baixo a dirección de Ana Álvarez, profesora da Escola Politécnica de Enxeñaría de Ferrol (EPEF), e de Rafael Morgade, responsable de Transformación Dixital e Industrial de Navantia na ría de Ferrol.
Ao longo do relatorio explicarase a importancia do mar a nivel xeoestratéxico e que tecnoloxías están a cobrar relevancia no contexto actual. Iago González exporá en que se está a traballar actualmente desde monodon e como a innovación é clave para ofrecer solucións ás necesidades de defensa.
Iago González é psicólogo, con mestrado en Recursos Humanos e en Formación do Profesorado. Desempeñou postos relacionados coa súa formación académica en compañías financeiras e do ámbito da defensa. En Navantia, asumiu diversas responsabilidades na área de Recursos Humanos e, desde 2023, forma parte do equipo de monodon.
