Ferrol, 17 de outubro de 2025.- Adquirir as ferramentas prácticas e as experiencias persoais e profesionais que lle permitan ao alumnado dos últimos cursos de grao e de máster da Universidade da Coruña (UDC) achegarse ao mundo laboral. Este é o principal obxectivo de “Sementando o Futuro. Obradoiros de Emprego e Emprendemento”, unhas xornadas formativas impulsadas desde o Campus Industrial co apoio do Concello de Ferrol no marco dun convenio de colaboración entre a Consellería de Emprego, Comercio e Emigración da Xunta de Galicia e as tres universidades públicas galegas para a promoción e o apoio ao emprendemento entre a comunidade universitaria.
A primeira das catro sesións deste programa formativo terá lugar o vindeiro xoves 23 de outubro, de 16:30 a 19:30 horas, na Aula 1.5 da Facultade de Humanidades e Documentación, da man do experto en metodoloxía Lego Serious Play e dinamizador de equipos e transformación dixital en Implicatum, Pablo López. A segunda proposta, centrada na construción dunha marca persoal coherente, dun currículo de impacto e dunha presentación relampo memorable, será impartida, o venres 24 de outubro, de 10:00 a 13:00 horas, neste mesmo espazo, polo enxeñeiro, mentor de carreira e empresario Sergio Farré.
O Salón de Actos Concepción Arenal do Campus Industrial de Ferrol acollerá, o xoves 30 de outubro, ás 18:30 horas, a clase maxistral do CEO e fundador de Productividad Feroz, Miguel Navarro. E, para rematar, o xoves 6 de novembro, de 16:30 a 19:30 horas, na Facultade de Humanidades e Documentación, terá lugar un encontro con cinco persoas emprendedoras de éxito de diferentes sectores.
As xornadas formativas “Sementando o Futuro. Obradoiros de Emprego e Emprendemento” están dirixidas a toda a comunidade universitaria e público xeral interesado. Todas as actividades son gratuítas pero precisan de inscrición previa. Máis información chamando ao 881 01 3674 ou enviando un correo electrónico a transferencia.campus.industrial@udc.gal.
Inscrición nas Xornadas “Sementando o Futuro. Obradoiros de Emprego e emprendemento”
