Ferrol, 5 de marzo de 2026.- O XIV Congreso de Estudantes de Podoloxía de Galicia reúne, este xoves 5 e venres 6 de marzo, no Salón de Actos Concepción Arenal do Campus Industrial de Ferrol, a máis de 160 participantes, na súa inmensa maioría, alumnos e alumnas deste grao na Facultade de Enfermaría e Podoloxía da Universidade da Coruña (UDC) e na Facultad de Ciencias de la Salud da Universidad de León, así como a un bo número de persoas expertas neste campo procedentes de distintos puntos de España.
Un ano máis, o evento está organizado polo alumnado do 4º curso do Grao en Podoloxía do Campus Industrial de Ferrol e, en colaboración, coa Asociación Galega de Estudantes de Podoloxía da Universidade da Coruña (AGEP UDC), nada en novembro de 2024.
A vicerreitora do Campus de Ferrol e Responsabilidade Social, Ana Ares, presidiu, a primeira hora deste xoves, o acto de inauguración do XIV Congreso de Estudantes de Podoloxía de Galicia no que tamén participaron a concelleira de Educación, Universidade e Política Lingüística, Patricia Cons, a presidenta do Colexio Oficial de Podoloxía de Galicia (COPOGA), Ana María Requeijo, e o decano da Facultade de Enfermaría e Podoloxía, Pedro Gil.
Na súa intervención, Ana Ares, felicitou a todos os alumnos e alumnas que integran o Comité Organizador e, en especial, á súa presidenta e vicepresidenta, Lucía Martínez e Xuliana Lorenzo. A vicerreitora tamén salientou o papel dun congreso que, cada ano, trae ata ao Campus Industrial de Ferrol a profesionais de recoñecido prestixio no eido da podoloxía. Nesta mesma liña, o decano da Facultade de Enfermaría e Podoloxía, Pedro Gil, gabou o traballo realizado polo alumnado e a colaboración coa AGEP UDC.
Pola súa banda, a concelleira de Universidade, Patricia Cons, amosou o seu apoio a esta iniciativa ao tempo que salientou o papel da Universidade como motor de desenvolvemento, innovación e dinamización para a cidade. Na súa quenda de intervención, a presidenta do Colexio Oficial de Podoloxía de Galicia (COPOGA), Ana María Requeijo, animou ás persoas participantes a continuar formándose nunha disciplina “viva e en constante evolución”,
Un total de 11 conferencias e 10 obradoiros teórico-prácticos impartidos por profesionais de recoñecido prestixio a nivel nacional e internacional
O programa deste XIV Congreso de Estudantes de Podoloxía de Galicia inclúe, na mañá do xoves 5 de marzo, as conferencias da especialista do Equipo Internacional de Ortopedia Pediátrica e Método Ponseti Dra. Ey na Clínica Diagonal, en Barcelona, Marta Vinyals; do CEO de Integral Biomechanics & Orthopodiatry (IBOP), a primeira EBC en Biomecánica e Ortopodoloxía da Universidad de Sevilla (US), José Manuel Castillo, ou do presidente de Profesionales de la Podología Española (PROPODE), Alejandro Fernández.
Tamén se achegarán ata o Campus Industrial de Ferrol, ao logo da mañá, o xefe da Unidade de Pé Diabético da Universidad Complutense de Madrid (UCM), José Luis Lázaro; o podólogo da Clínica Felipe Basas, en Salamanca, Carlos Virosta, e o xerente da Clínica Podológica Vigil, en Oviedo, Manuel L. Vigil.
Xa pola tarde, a Facultade de Enfermaría e Podoloxía acollerá un total de 10 obradoiros teórico-prácticos impartidos, entre outros moitos profesionais, polo podólogo e divulgador Manuel Vidal, polo CEO de GABA Podología & Movimiento, en Sevilla, José Gabriel Garrido, polos membros da ONG Podología Sin Fronteras, Antonio Muñoz e David Rodilla, ou pola directora da Clínica Podológica Martínez, na Coruña, Dolores Martínez;
Para rematar, o programa do congreso, inclúe, para a xornada do venres 6 de marzo, entre outras propostas, as conferencias do director da Clínica Supié, en Valladolid, Héctor Alonso, ou do creador da marca Brain4Feet, Sergi Prades.
