Ferrol, 15 de decembro de 2023.- A profesora da Facultade de Ciencias da Universidade Abov Berkr Belkaid de Tlemcen en Alxeria, Fatiha Smain, vistou esta semana o Campus Industrial de Ferrol convidada polo director do departamento de Enxeñaría Industrial, o profesor José Luis Calvo Rolle. Ao longo da súa estadía, esta docente e investigadora alxerina puido coñecer máis polo miúdo a oferta formativa da Escola Politécnica de Enxeñaría de Ferrol (EPEF), así como as capacidades investigadoras do persoal da Universidade da Coruña, co obxectivo de impulsar novas vías de colaboración entre ambas as dúas institucións educativas.
Fatiha Smain amosouse moi satisfeita logo das reunións de traballo mantidas con varios dos integrantes do grupo de investigación en Ciencia e Ciencia Cibernética, entre os que figuraban José Luis Calvo Rolle, José Luis Casteleiro Roca, Esteban Jove Pérez e máis Hector Quintián Pardo. Ao longo da semana, tamén tivo a oportunidade de achegarse ata o Centro de Investigación en Tecnoloxías Navais e Industriais (CITENI) onde puido coñecer o Laboratorio de Plásticos (LabPlast) e reunirse coa coordinadora do grupo de Polímeros, a profesora e investigadora María José Abad.
Por último, cómpre sinalar que a profesora e investigadora da Universidade Abov Berkr Belkaid de Alxeria, Fatiha Smain, é tamén alumna do Campus Industrial de Ferrol. Na actualidade está a cursar o máster en Eficiencia Enerxética e Sustentabilidade, que se imparte, na súa modalidade presencial, na Escola Politécnica de Enxeñaría de Ferrol, e que ela estuda a distancia grazas a un convenio de colaboración entre a Universidade da Coruña e a Fundación Mulleres por África, que cubre os gastos derivados da súa matrícula.
