Ferrol, 14 de xullo de 2023.- O reitor da Universidade da Coruña, Julio Abalde, a vicerreitora do Campus de Ferrol e Responsabilidade Social, María Jesús Movilla, e a directora do Campus Industrial, Ana Ares, reciben este luns 17 de xullo, ás 09:30 horas, na Aula 1.1 do Edificio de Apoio ao Estudo, aos preto de 40 participantes na International Summer School on Smart Industry and Advanced Manufacturing que organiza entre o 17 e o 21 e entre o 24 e 28 de xullo o Campus Industrial de Ferrol.
Os participantes, na súa inmensa maioría, estudantes universitarios e persoal investigador e de administración e servizos, proveñen de máis de 30 países distintos tales como Armenia, Marrocos, Turquía, Rusia, Xeorxia, Uzvekistan, Xamaica, Ucraína, Albania, Portugal, Rumanía, Polonia, Siria, Exipto, Eslovaquia, Letonia, Francia, Montenegro, Serbia, Austria, Arxelia, Azerbaixán, Moldavia, Alemaña, Bulgaria, Malasia, Nixeria, Venezuela, Benín, Ghana e India.
A Internacional Summer School on Smart Industry and Advanced Manufacturing ofrecélles a posibilidade de participar en varios cursos de formación centrados nos eidos da intelixencia artificial, da enerxía sostible, do desenvolvemento de novos produtos ou materiais, do deseño ou no do emprendemento. A maiores, o programa inclúe cadansúa visita semanal ao Centro de Investigación en Tecnoloxías Navais e Industriais (CITENI), situado no Campus Industrial de Ferrol, e a Exponav. As actividades culturais e de ocio complétanse con visitas guiadas pola cidade, percorridos polas praias da comarca ou con sesións de cinema ao aire libre.
