Cinco alumnas do grao en Relacións Internacionais, Belén Míguez Ramos (A Coruña, 2005), Irene Rodiles Lago (Santiago de Compostela, 2006), Laura Yáñez Rodríguez (Gijón, 2007), María Falcón Louzao (Pontevedra, 2006) e Eva Maseda Truyols (Madrid, 2006) organizan, o venres 24 de abril, a partires das 10:00 horas, no Campus Industrial de Ferrol, a primeira edición do Atlantic Moot Court, a simulación dun caso da Corte Internacional de Xustiza, o principal órgano xudicial da Organización das Nacións Unidas (ONU) e o encargado de resolver disputas entre Estados e de emitir opinións consultivas sobre cuestións xurídicas internacionais.
Para comezar esta xornada e logo da correspondente apertura institucional, o Salón de Actos Concepción Arenal do Campus Industrial de Ferrol acollerá, ás 10:30 horas, a conferencia “Desorde mundial e convulsións xeopolíticas en Oriente Medio”, impartida polo codirector do Instituto sobre Conflitos e Acción Humanitaria (iecah), Jesús A. Núñez Villaverde. Este relatorio foi organizado no marco dos Seminarios de Formación de Internacionalistas do grao el Relacións Internacionais no curso 2025/26 e en colaboración coa Asociación de Internacionalistas de Galicia (ASIG).
Xa pola tarde, a partires das 15:30 horas, divididos en 6 equipos, os preto de 60 mozos e mozas inscritos nesta primeira edición do Atlantic Moot Court, simularán un caso no que se abordarán cuestión vinculadas ao Dereito Internacional Humanitario e aos conflitos armados. Participa alumnado da Universidade da Coruña (UDC), da Universidade de Vigo (UVigo), da Universidade de Santiago de Compostela (USC), da Universidad de León, da Universidad de Salamanca (USAL), da Universidad Rey Juan Carlos (URJC) e da Universitat Autòmoma de Barcelona (UAB).
