O Campus Industrial de Ferrol acolle mañá unha xornada informativa sobre os programas Ignicia e Oportunius que promove a Axencia Galega de Innovación

Unha investigadora do Laboratorio de Bioenxeñaría Ambiental e Control de Calidade no seu espazo de traballo situado no CIS A Cabana.

Ferrol, 20 de abril de 2022.- A vicerreitora do Campus de Ferrol e Responsabilidade Social, María Jesús Movilla, a directora do Campus Industrial, Ana Ares, e a directora da Área de Centros da Axencia Galega de Innovación, María José Mariño, inauguran mañá, xoves 21 de abril, ás 10:00 horas, no Salón de Actos Concepción Arenal do Campus Industrial de Ferrol, a xornada “Apoios da Axencia Galega de Innovación á Transferencia de Coñecemento e á Ciencia Excelente” que promove esta entidade en colaboración coa Universidade da Coruña.

A xornada, que  pretende dar a coñecer as oportunidades que ofrecen os programas Ignicia Transferencia de Coñecemento e Oportunius ao persoal investigador e de xestión de transferencia que traballan no Campus Industrial de Ferrol, contará con varios testemuños de proxectos emprendedores e de persoal investigador e de xestión da transferencia que se beneficiaron dos programas Ignicia e Oportunius en anteriores edicións.