Ferrol, 28 de febreiro de 2023.- A vicerreitora do Campus de Ferrol e Responsabilidade Social, María Jesús Movilla, a directora do Campus Industrial, Ana Ares, e a investigadora do Centro de Investigación en Tecnoloxías Navais e Industriais (CITENI), Sonia Zaragoza, recibiron a semana pasada, no Campus Industrial de Ferrol, aos representantes das institucións e organizacións participantes no proxecto europeo Comumunity of Valued Experts in Hydrometeorological and Technological Multi-Hazards (COVALEX) que lidera a Universidade da Coruña.
O proxecto COVALEX pretende mellorar a comunicación entre os países europeos ante as emerxencias, principalmente desastres de carácter hidrometereolóxicos ou aqueles derivados de factores multirrisco, creando sistemas de protección civil máis resilientes e multidisciplinares. Está financiado pola Comisión Europea e conta cun orzamento de 774.359 euros, distribuído entre seis socios de cinco países europeos (Italia, Grecia, Austria, Francia e España). A Universidade da Coruña disporá de máis de 200.000 euros liderar e coordinar o proxecto.
