O Campus Industrial de Ferrol acolle os días 10 e 11 de marzo unhas xornadas sobre as ciencias da comunicación e a internet

O profesor da Facultade de Humanidades e Documentación, Wenceslao J. González, coordina as ‘Xornadas sobre Ciencias da Comunicación e Internet: Linguaxe e novas formas de pensar’ que terán lugar os días 10 e 11 de marzo no Salón de Actos Concepción Arenal do Campus Industrial de Ferrol.

Ferrol, 18 de febreiro de 2022.- O Salón de Actos Concepción Arenal do Campus Industrial de Ferrol acollerá, o 10 e 11 de marzo, as Xornadas sobre Ciencias da Comunicación e Internet: Linguaxe e novas formas de pensar que promove o Centro de Investigación de Filosofía da Ciencia e a Tecnoloxía (CIFCYT) da Universidade da Coruña en colaboración coa Sociedade de Lóxica, Metodoloxía e Filosofía da Ciencia en España.

Ao longo destes dous días, investigadores de recoñecido prestixio internacional analizarán as relacións entre as ciencias da comunicación e a internet desde a perspectiva das innovacións introducidas na linguaxe e das novas formas de pensar que fomentou a internet a través, por exemplo, do auxe das redes sociais. Así, entre os relatores figuran investigadores de fenómenos comunicativos na rede de redes, filósofos e tecnólogos dedicados ao estudo da internet como soporte para novos usos da linguaxe, incluíndo as fake news, e como base para novas formas de pensar. No programa das xornadas destaca a presenza de Robert Picard (Universidade de Oxford) xunto con Des Freedman (Universidade de Londres), Anders Henten (Universidade de Aalborg), Carolina Moreno (Universidade de Valencia) e Jesús Alcolea (Universidade de Valencia).

As persoas interesadas en participar neste congreso que se enmarca dentro das XXVII Xornadas de Filosofía e Metodoloxía actual da ciencia terán que enviar un correo electrónico cos seus datos persoais a jornadas.filosofia.ciencia@udc.es ou ben chamar ao 881 01 3814. O prazo de inscrición permanecerá aberto ata o vindeiro venres 25 de febreiro.

 

Máis información: https://cifcyt.udc.es