Ferrol, 19 de outubro de 2024.- O EPEF Racing Team, integrado por alumnado de grao, de máster e de programas de doutoramento da Escola Politécnica de Enxeñaría de Ferrol (EPEF) da Universidade da Coruña (UDC), acadou o premio á Best Engineered KitCar na Estrada Urban Race, a primeira carreira urbana de vehículos eléctricos de Galicia que organizaron, este sábado 19 de outubro, entre as 11:00 e as 14:00 horas, nas inmediacións do Pavillón Poliderportivo Manuel Soto Ferreiro, a Xunta de Galicia e o Concello da Estrada en colaboración con Greenpower Iberia.
A organización desta I Estrada Urban Race valorou moi positivamente as melloras realizadas no vehículo do equipo EPEF Racing Team, entre as que destaca a incorporación dun cambio de marchas e un control de potencia. Algo no que tamén coincidiron os dous membros da Institution of Mechanical Engineers (IMechE) de Reino Unido que participaron nesta primeira competición urbana de coches eléctricos de Galicia como observadores independentes.
Con todo, esta é a segunda vez que o alumnado do Campus Industrial de Ferrol acada este galardón á mellor enxeñaría. De feito, o pasado 8 de xuño, o equipo EPEF Racing Team lograba este mesmo distintivo na I Carreira Greenpower de Galicia que tivo lugar no circuíto de karting pontés da man da propia Escola Politécnica de Enxeñaría de Ferrol (EPEF), baixo o paraugas do Campus Industrial da Universidade da Coruña, en colaboración coa Escudaría As Pontes Motorsport.
O Kastro Sport Team, do IES Castro da Uz das Pontes, gañador na categoría F24+
O equipo Kastro Sport Team, do IES Castro da UZ das Pontes, conseguiu o primeiro premio da Estrada Urban Race na categoría F24+, de 16 a 25 anos, e o Llume Yerbata, da Asociación Llume Yerbata de Bimenes, en Asturias, o equivalente, pero na categoría F24, de 11 a 16 anos. Esta primeira carreira urbana de vehículos eléctricos reuniu na Estrada a 7 equipos, integrados por alumnado de Formación Profesional (FP) procedentes de distintos puntos de Galicia e de Asturias así como por estudantado da Universidade da Coruña.
