O reitor, Julio Abalde, inaugurou no Campus Industrial de Ferrol as xornadas de Filosofía e Ciencia dedicadas á comunicación e á internet

Ferrol, 10 de marzo de 2022.- O reitor da Universidade da Coruña, Julio Abalde, inaugurou esta mañá, no Salón de Actos Concepción Arenal do Campus Industrial de Ferrol, a XXVII edición das Xornadas de Filosofía e Metodoloxía Actual da Ciencia dedicadas ás Ciencias da Comunicación e á Internet, acompañado pola directora do Campus Industrial, Ana Ares, e o coordinador das xornadas, o profesor Wenceslao J. González.

Ao longo destes dous días, investigadores de recoñecido prestixio internacional analizarán as relacións entre as ciencias da comunicación e a internet desde a perspectiva das innovacións introducidas na linguaxe e das novas formas de pensar que fomentou a internet a través, por exemplo, do auxe das redes sociais. Entre os relatores figuran investigadores de fenómenos comunicativos na rede de redes, filósofos e tecnólogos dedicados ao estudo da internet como soporte para novos usos da linguaxe, incluíndo as fake news, e como base para novas formas de pensar. No programa das xornadas destaca a presenza de Robert Picard (Universidade de Oxford) xunto con Des Freedman (Universidade de Londres), Anders Henten (Universidade de Aalborg), Carolina Moreno (Universidade de Valencia) e Jesús Alcolea (Universidade de Valencia).

As xornadas están organizadas polo Centro de Investigación de Filosofía da Ciencia e a Tecnoloxía (CIFCYT) da Universidade da Coruña en colaboración coa Sociedade de Lóxica, Metodoloxía e Filosofía da Ciencia en España.

 

Máis información: https://cifcyt.udc.es