Ferrol, 22 de xuño de 2023.- A vicerreitora do Campus de Ferrol e Responsabilidade Social, María Jesús Movilla, a presidenta do Club de Prensa de Ferrol, Julia Díaz, a coordinadora do curso Carlos Gurméndez, Esperanza Piñeiro, e o director académico do mesmo, o profesor da Universidade da Coruña, Alberto Sucasas, presentaron este xoves, na Sala de Xuntas da Vicerreitoría, a 24ª edición deste curso de pensamento e comunicación que terá lugar os días 5, 6 e 7 de xullo no Salón de Actos Concepción Arenal do Campus Industrial de Ferrol e que afondará nos beneficios e desafíos da globalización.
Na súa intervención, a vicerreitora do Campus de Ferrol e Responsabilidade Social, María Jesús Movilla, gabou o traballo realizado polo Club de Prensa de Ferrol a prol da profesión e do conxunto da sociedade ao tempo que destacou a elección, un ano máis, do Campus Industrial de Ferrol como espazo de referencia para levar a cabo as conferencias e mesas redondas do curso Carlos Gurméndez. Pola súa banda, a presidenta do Club de Prensa de Ferrol, Julia Díaz, subliñou o interese que esperta entre a propia comunidade universitaria e o profesorado de secundaria unha proposta divulgativa que este ano incluirá a presentación do libro do presidente de honra do Club de Prensa de Ferrol, Carlos Castro, titulado “Carlos Gurméndez: Galicia e os espazos abertos de Ferrolterra”.
Tal e como explicou o director académico do curso, Alberto Sucasas, as xornadas darán comezo o mércores 5 de xullo, ás 10:00 horas, coa apertura oficial por parte do director xeral de Cultura da Xunta de Galicia, Anxo Lorenzo. O exreitor da Universidade de Santiago de Compostela, Darío Villanueva, a catedrática de Dereito Internacional Público e Relacións Internacionais da Universidade de Santiago de Compostela, Isabel Lirola Delgado, e a filósofa, ensaísta e política Carme Adán completan a listaxe de intervencións programadas para o primeiro día.
Ao longo do xoves 6 e venres 7 de xullo, achegaranse ata o Campus Industrial de Ferrol o membro do Consello Superior de Investigacións Científicas (CSIC), José Antonio Zamora, o xornalista de El País, Ricardo de Querol, a profesora de Filosofía Moral da Universidade de Oviedo, Asunción Herrera, a exconselleira de Sanidade da Xunta de Galicia, Pilar Farjas, o profesor de Filosofía Política e Antropoloxía da Universidade de Deusto, Patxi Lanceros, e a directora do Campus Industrial da Universidade da Coruña, Ana Ares, entre outros. A última das conferencias da 24ª edición do curso Carlos Gurméndez impartiraa o director da Fundación Juan March, Javier Gomá.
As persoas interesadas en participar neste curso gratuíto terán que enviar un correo electrónico cos seus datos persoais a info@clubdeprensaferrol.com ou ben chamar ao 661 331 986 antes das 10:30 horas do mércores 5 de xullo. As prazas son limitadas e cubriranse por rigorosa orde de inscrición. O curso conta coa homologación de 20 horas da Consellaría de Cultura, Educación e Ordenación Universitaria da Xunta de Galicia para o profesorado de ensino non universitario.
Programa – 24ª edición do Curso de Pensamento e Comunicación Carlos Gurméndez
Foto: De esquerda a dereita, a coordinadora do curso Carlos Gurméndez, Esperanza Piñeiro, a presidenta do Club de Prensa de Ferrol, Julia Díaz, a vicerreitora do Campus de Ferrol e Responsabilidade Social, María Jesús Movilla, e e o director académico do mesmo, o profesor da Universidade da Coruña, Alberto Sucasas, durante a presentación en rolda de prensa da 24ª edición do Curso de Pensamento e Comunicación Carlos Gurméndez que tivo lugar este xoves na Sala de Xuntas da Vicerreitoría do Campus de Ferrol e Responsabilidade Social.
