Ferrol, 1 de marzo de 2023.- O vicerreitor de Política Científica, Investigación e Transferencia, Salvador Naya Fernández, a decana da Facultade de Enfermaría e Podoloxía, Emma Rodríguez Maseda, o presidente do Colexio Oficial de Podólogos de Galicia, Juan Dios Tomé, e a presidenta do Comité Organizador do XI Congreso de Estudantes de Podoloxía de Galicia e alumna do 4º curso do grao en Podoloxía, Laura Fariñas Freije, inauguran mañá, xoves 2 de marzo, ás 10:00 horas, un congreso no que participan máis de 100 estudantes e expertos nesta disciplina.
Ao longo dos próximos dous días, o alumnado inscrito no congreso poderá participar en diversas conferencias relacionadas coa súa área académica así como en varios obradoiros especializados nos que se afondará, entre outros, no método Brain4Feet, na exploración biomecánica, no funcionamento e utilidades do uso das ortonixias na reeducación ungueal ou nas terapias físicas de electrolisis e de neuromodulación ecoguiada. Entre o amplo abano de convidados figuran os podólogos e podólogas Bernardino Basas, Eugeni Llorca, Daniel Torres, Francisco Alonso, Gloria García, Alba Armesto ou Sara Campos.
