Ferrol, 31 de outubro de 2024.- Suidade Deseño Galego, unha marca de bolsos elaborados de xeito artesanal botando man de láminas de madeira de pino galego e de coiro curtido de xeito vexetal, detrás da que está a alumna do Grao en Xestión Industrial da Moda na Facultade de Humanidades e Documentación da UDC, Yolanda Blanco Pereiro, vén de acadar o primeiro premio no I Concurso Iniciativa Emprendedora que promove a Universidade da Coruña xunto coa Fundación Ronsel. Esta estudante do Campus Industrial de Ferrol recibiu un cheque por valor de 600 horas e 20 horas de asesoramento gratuíto para a maduración do seu proxecto empresarial.
Pola súa banda, DT Autopro, un taller especializado en pneumáticos e mecánica rápida para camións e turismos, liderado polo alumno do Máster en Enxeñaría Industrial na Escola Politécnica de Enxeñaría de Ferrol (EPEF), David Tojeiro Paz, fíxose co accésit deste certame para apoiar o emprendemento entre a comunidade universitaria e disporá de 8 horas de mentoría gratuíta para a mellora da súa idea de negocio.
O xurado estivo integrado polo co-fundador de Vermislab, Designthinking.gal e da Maker Faire Galicia, Enrique Saavedra; a presidenta da Asociación de Empresarios de Ferrol, Eume e Ortegal (AJE Ferrolterra) e fundadora de Más Cuidados Multiservicios e da Residencia Canina El Bosque, Yadira Tenreiro; o coordinador de Emprendemento na Fundación Ronsel, Rafael Vázquez Cobas; e a profesora da Universidade da Coruña, Verónica Crespo Pereira.
Tal e como explicaron antes do acto de entrega de premios, para a toma de decisións, este grupo de persoas expertas en empredemento valorou a orixinalidade e o carácter innovador da proposta, a viabilidade comercial da idea e da súa implementación no mercado, o grao de maduración da iniciativa, o impacto económico e social do proxecto, o grao de implicación da ou das persoas emprendedoras así como a exposición pública realizada este mércores, 30 de outubro, no Salón de Actos Concepción Arenal do Campus Industrial de Ferrol, no marco da Xornada de Emprendemento ActitudE. Esta última é unha actividade de divulgación posta en marcha no marco dun convenio de colaboración entre a Consellería de Promoción de Emprego e Igualdade e as tres universidades públicas galegas para a promoción e o apoio ao emprendemento na comunidade universitaria.
Cinco proxectos empresariais nados no Campus Industrial de Ferrol
Ademais de Suidade Deseño Galego e DT Autopro, no I Concurso Iniciativa Emprendedora presentáronse outros tres proxectos entre os que figuraba a spin-off Motion and Force Engineering Solutions (MFES), promovida polos investigadores do Laboratorio de Enxeñaría Mecánica do Centro de Investigación en Tecnoloxías Navais e Industriais (CITENI) Javier Cuadrado Arnada, Urbano Lugrís Armesto e Florian Michaud.
Do mesmo xeito, neste certame impulsado pola Universidade da Coruña e a Fundación Ronsel, tamén participaron a plataforma en liña para pequenas e medianas empresas de moda emerxente Colykke, liderada polas alumnas do Grao en Xestión Industrial da Moda Candela Giz Rodríguez e Carla González Roca, así como a marca de xoiería artesá Emma Bracelets, detrás da que está a alumna do Máster en Enxeñaría Industrial Marina Vega Neira. Finalmente, todas as persoas participantes no concurso recibirán asesoramento gratuíto para madurar os seus proxectos empresariais.
