Ferrol, 14 de febreiro de 2023.- A Sala de Exposicións do Centro Cultural Universitario do Campus Industrial de Ferrol acolle este sábado, 18 de febreiro, de 11:00 a 14:00 horas, a feira “Ciencia na Rúa”, un evento de divulgación no que participarán máis de 100 nenos e nenas de entre 4 e 16 anos da man da Asociación Áurega e da Academia Gazapo de Narón en colaboración coa Universidade da Coruña.
Para conmemorar o Día Internacional da Muller e da Nena na Ciencia, que tivo lugar o pasado sábado 11 de febreiro, os nenos e nenas da Asociación Áurega, divididos en pequenos grupos, estiveron a afondar durante as últimas semanas na traxectoria de 10 mulleres científicas: a astrofísica Gabriela González, a astrónoma Antonia Ferrín, a oceanógrafa Ángeles Alvariño, a enxeñeira Emily Roebling, a farmacéutica Eugenia Pereira, a bioquímica Margarita Salas, a enxeñeira industrial Elena García Armada, a astrofísica Begoña Vila, a precursora do libro electrónico Ángela Ruíz Robles, e a científica espacial Katherine Johnson. Os resultados das súas pescudas exporanse en cadanseu stand ao longo de toda a xornada.
