Estas axudas teñen como obxectivo atraer persoal investigador de centros estranxeiros ao Campus Industrial de Ferrol co fin de promover a internacionalización, estimulando a colaboración científica entre estes e o persoal investigador do Campus Industrial de Ferrol. Ofrécense dúas modalidades:

Visitas Longas: duración mínima dun mes e máxima de tres meses.

Estancias Curtas: duración mínima de tres días consecutivos e máxima de cinco días.

En calquera das modalidades, o investigador ou investigadora deberá impartir unha breve conferencia no Campus Industrial de Ferrol para fomentar a relación co persoal investigador do CIF. Estas axudas están destinadas a cubrir total ou parcialmente os gastos de viaxe, aloxamento e manutención do persoal investigador visitante estranxeiro.

Durante o período 2022 – 2025, esta convocatoria concedeu 29 mobilidades a Ferrol desde todos os recunchos do mundo, como a Universidade de Pretoria (Sudáfrica), a Universidade de Canberra (Australia), o Instituto de Ciencia e Tecnoloxía de Okinawa (Xapón), a Universidade de Ciencia e Tecnoloxía de Nanjing (China), a Universidade Metropolitana de Toronto (Canadá) ou a Universidade Khazar (Acerbaixán), entre outras.